تاجر تنظیموں کی اپیل پر میاں نوازشریف سے اظہار یکجہتی اور عدالتی فیصلے کے خلاف لاہور میں مکمل شٹر ڈاؤن

لاہور۔ پاکستان مسلم لیگ (ن) کے قائد میاں محمد نوازشریف کو لاہور ہائی کورٹ کی جانب سے ضمنی الیکشن کیلئے نااہل قرار دیئے جانے کے خلاف انجمن تاجران پاکستان اور قومی تاجر اتحاد لاہور کی اپیل پر صوبائی دارالحکومت میں مکمل شٹر ڈاؤن رہا۔ تفصیلات کے مطابق انجمن تاجران پاکستان کے صدر حاجی مقصود بٹ اور قومی تاجر اتحاد لاہور کے صدر اظہر سعید بٹ نے میاں نوازشریف کی نااہلی پر میاں نوازشریف اور مسلم لیگ (ن) سے اظہار یکجہتی کیلئے شٹر ڈآؤن کی کال دی تھی۔ ہفتہ کے روز تاجر تنظیموں کی کال انتہائی کامیاب رہی اور شہر کے تمام بڑے کاروباری مراکز مکمل طور پر بند رہے۔ بند رہنے والی مارکیٹوں میں برانڈرتھ روڈ، بیڈن روڈ، ہال روڈ، مال روڈ، شاہ عالم مارکیٹ، لنڈا بازار، لبرٹی مارکیٹ، مین مارکیٹ گلبرگ، بادامی باغ، آٹو مارکیٹ، لٹن روڈ، بانساں والا بازار، رنگ محل، ملتان روڈ، عابد مارکیٹ، فیروزپور روڈ اور دیگر کاروباری مراکز شامل ہیں۔