آرمی چیف کو تبدیل کرنے کی خبریں بے بنیاد ہیں

صدر مملکت کے ترجمان میجر جنرل (ر) راشد قریشی نے چیف آف آرمی سٹاف کی تبدیلی کے حوالہ سے ذرائع ابلاغ کی خبروں کی سختی سے تردید کرتے ہوئے کہا ہے کہ چیف آف آرمی سٹاف کا انتخاب میرٹ پر ہوا تھا اور ان کی تبدیلی کے حوالہ سے کوئی غور نہیں ہو رہا۔ اتوار کو بعض اخبارات اور ٹی وی چینلز پر آرمی چیف کی تبدیلی کے متعلق جاری خبروں پر تبصرہ کرتے ہوئے ترجمان نے کہا کہ ایسی خبریں قطعی بے بنیاد اور من گھڑت ہیں اور ان میں کوئی صداقت نہیں ہے، ایسی خبروں کا مقصد فوج اور صدر کے درمیان تعلقات خراب کرنا ہے۔ ترجمان نے کہا کہ آرمی چیف کا انتخاب میرٹ پر کیا گیا تھا اور صدر مملکت کا اس بات پر پختہ یقین ہے کہ چیف آف آرمی سٹاف کی تین سالہ مدت کی خلاف ورزی نہیں ہونی چاہئے۔ راشد قریشی نے کہا کہ اس طرح کی خبریں بعض عناصر مذموم مقاصد کیلئے پھیلاتے ہیں جو بدنیتی پر مبنی ہوتی ہیں۔