اعلان مری پر عملدرآمد نہ کر کے آصف علی زرداری اپنی مقبولیت کھو رہے ہیں ۔نواز شریف

لاہور ۔ پاکستان کے سابق وزیراعظم اور مسلم لیگ (ن) کے قائد میاں نواز شریف نے کہاہے کہ معزول ججوں کی بحالی کے معاہدے پر اعلان مری کے مطابق عملدرآمد نہ کر کے آصف علی زرداری عوامی مقبولیت کھو رہے ہیں اور مجھے ان کی طرف سے وعدہ پورا نہ کرنے پر دلی صدمہ پہنچا ہے ۔ ان خیالات کا اظہار انہوں نے اپنی رہائش گاہ پر ایک غیر ملکی ٹی وی کو دئیے گئے انٹرویو میں کیا انہوں نے کہاکہ آصف علی زرداری کے اس رویے سے نہ صرف ان پر بلکہ ان کی پارٹی پر بھی الزام آرہا ہے جس کی وہ نمائندگی کرتے ہیں ۔ انہوں نے کہاکہ اگر ہم نے اپنے وعدوں پر عملدر آمد نہ کیا تو عوام مایوس ہو جائیں گے ہم نے ججوں کی بحالی کے حوالے سے ایک واضح معاہدے پر دستخط کئے تھے جس پر ابھی تک عملدرآمد نہیں ہو سکا ہے انہوں نے کہا کہ ہم کس طرح ایک ایسے شخص کے ساتھ مفاہمت کر سکتے ہیں جس نے ملک کا آئین توڑا ہو اور سنگین جرائم کامرتکب ہوا ہو انہوں نے کہاکہ ایسے شخص کے خلاف عدالتی کارروائی ہونی چاہیے نواز شریف نے صدر پرویز مشرف کے مواخذے کے حوالے سے ایک سوال کے جواب میں کہاکہ اٹھارہ فروری کے انتخابات میں عوام نے صدر پرویز مشرف کے خلاف واضح مینڈیٹ دیا ہے اور اس کی پالیسیوں کو مسترد کر دیا ہے اب صدر مشرف کو اپنے عہدے سے استعفی دے دینا چاہیے انہوں نے کہاکہ معاہدہ مری میں واضح طور پر لکھا ہے کہ معزول ججوں کی بحالی پارلیمنٹ میں ایک قرار داد کے ذریعے ہو گی اس معاہدے میں کہیںدرج نہیںہے کہ ججوں کی بحالی کسی آئینی ترمیم کے ذریعے ہوگی جو آصف زرداری نے ہمیں بھیجی ہے انہوںنے کہاکہ آصف علی زرداری کی تجاویز صدر پرویز مشرف کے تین نومبر 2007ء کے اقدامات قبول کرنے کے مترادف ہے