ججوں کی رہائی کا خیر مقدم کرتے ہیں لیکن قوم منتظر ہے کہ ڈاکٹر قدیر کی رہائی اور عدلیہ کی بحالی کے احکامات کب جاری ہوتے ہیں ۔ قاضی حسین احمد

لاہور۔ امیر جماعت اسلامی پاکستان قاضی حسین احمد نے چیف جسٹس آف پاکستان اور پی سی او کے تحت حلف نہ اٹھانے والے تمام نظر بند ججوں کی نو منتخب وزیر اعظم مخدوم یوسف رضا گیلانی کی طرف سے رہائی کا حکم دینے کا خیر مقدم کیا ہے ۔ اپنے ایک بیان میں قاضی حسین احمد نے وزیر اعظم کو یا د دلایا ہے کہ عدلیہ پر شب خون مارنے سے بھی پہلے سے محسن پاکستان اور قومی ہیرو ڈاکٹر عبدالقدیر خان جرم بے گناہی کی قید کاٹ رہے ہیں ۔ قوم بجا طور پر توقع کر رہی تھی کہ وزیر اعظم اپنی پہلی تقریر میں چیف جسٹس افتخار محمد چوہدری اور عدلیہ کی رہائی و بحالی کے اعلان کے ساتھ ہی ان کی رہائی کے احکامات بھی جاری کریں گے ۔ قاضی حسین احمد نے کہا کہ قوم منتظر ہے کہ وزیر اعظم ڈاکٹر عبدالقدیر خان کی رہائی اور عدلیہ کی بحالی کے احکامات کب جاری کرتے ہیں ۔