ججز کی بحالی کے حوالے سے تاریخ نہیں دے سکتے ۔ ترجمان پی پی پی فرحت اللہ بابر

اسلام آباد۔ حکمران جماعت پی پی پی نے مسلم لیگ(ن) کے ساتھ مذاکرات جاری رکھنے کا اعلان کرتے ہوئے کہا ہے کہ ججز کی بحالی کی تاریخ نہیں دے سکتے ۔ آج ایک نجی ٹی وی انٹرویو میں پی پی پی کے ترجمان فرحت اللہ بابر نے کہا کہ مسلم لیگ(ن) کے ساتھ مذاکرات کو جاری رکھیں گے اور ان کو قائل کرنے کی کوششیں کریں گے تاہم ججوں کی بحالی کی تاریخ نہیں دے سکتے ۔ انہوں نے کہا کہ مسلم لیگ(ن) کے اعلان کے بعد ہمارے عزم میں کوئی فرق نہیں آیا ہم ججوں کی بحالی چاہتے ہیں تاہم اس کے لیے قانونی راستہ اختیار کیا جائے گا انہوں نے کہا کہ موجودہ ججوں کونہیں ہٹایا جائے گا اور ججوں کی تعداد بڑھانے کے لیے پارلیمنٹ میں بل پیش کیا جائے گا اور پی پی پی مسلم لیگ کے مقابلے میں امیدوار بھی نہیں لائے گی ۔