قوم عدلیہ کی بحالی میں تاخیر برداشت نہیں کرے گی ‘ شہباز شریف

لاہور ۔ مسلم لیگ ( ن ) کے صدر میاں شہباز شریف نے کہا ہے کہ قوم عدلیہ کی بحالی میں تاخیر برداشت نہیں کرے گی ۔ تاہم ان کی جماعت جمہوری نظام کو غیر مستحکم کر کے آمریت کے ہاتھ مضبوط نہیں کرنا چاہتی ۔ یہاں علامہ اقبال انٹرنیشنل ایئرپورٹ پر میڈیا سے گفتگو کرتے ہوئے انہوں نے کہا کہ ان کے نزدیک عدل و انصاف اتحاد سے بھی زیادہ اہم ہے ۔ انہوں نے الزام عائد کیا کہ ایوان صدر سازشوں کا گڑھ بنا ہوا ہے ۔ شہباز شریف نے کہا کہ انہوں نے مرکز میں پیپلزپارٹی اور پیپلزپارٹی نے پنجاب میں ان کا مینڈیٹ تسلیم کیا ہے ۔ انہوں نے کہا کہ ان کے کاغذات نامزدگی نامنطور کرانے کے لئے پرویز مشرف اور ان کے حواری گھناؤنے کھیل میں شریک ہیں اور دن رات کوششیں کر کے نئے جعلی مقدمات بنا کر اپنے مذموم مقاصد کے حصول کی جدوجہد کر رہے ہیں