ججز کی بحالی کے ٣٠ دن چاروں صوبوں میں حکومتیں قائم ہوتے ہی شروع ہوں گے ‘ شیری رحمان

کراچی میں پرتشدد واقعات نئی جمہوری حکومت کے خلاف سازش ہے ‘ وزیر اعظم نے تحقیقات کے احکامات جاری کر دیئے ہیں ‘ وزیر اطلاعات کی میڈیا سے گفتگواسلام آباد۔ وفاقی وزیر اطلاعات و نشریات شیری رحمان نے کہا ہے کہ ججز کی بحالی کے حوالے سے ٣٠ دن اس وقت شروع ہوں گے جب چاروں صوبوں میں حکومتیں قائم ہو جائیں گی ۔ ان خیالات کا اظہار انہوں نے جمعرات کو پارلیمنٹ ہاؤس میں میڈیا سے بات چیت کرتے ہوئے کیا ۔ شیری رحمان نے کہا کہ کراچی میں پرتشدد واقعات نئی جمہوری حکومت کے خلاف سازش ہے ۔ انہوں نے کہا کہ ملک میں جب سے نیا جمہوری سیٹ اپ قائم ہوا حالات بگاڑنے کی کوشش کی جا رہی ہیں ۔ وزیر اعظم نے ان واقعات کی تحقیقات کے احکامات جاری کر دیئے ہیں انہوں نے سندھ میں ابھی کابینہ نہیں بنی کہ ہنگامے شروع ہو گئے ۔ صورت حال کا ہر پہلو سے جائزہ لیا جا رہا ہے ۔ انہوں نے کہا کہ اس طرح پنجاب میں بھی کامیاب سیاسی جماعت نے اقتدار نہیں سنبھالا نئے جمہوری سیٹ اپ کو اقتدار کی منتقلی سے قبل ہی حالات خراب کئے جا رہے ہیں ۔ ایک سوال کے جواب میں وفاقی وزیر اطلاعات و نشریات شیری رحمان نے کہا کہ صوبوں میں حکومتوں کے قیام پر ججز کی بحالی سے متعلق 30 روز شروع ہوں گے ۔