وہ وقت دور نہیں جب ایوان صدر میں بھی سلمان تاثیر جیسا پیپلزپارٹی کا صدر بیٹھا ہوگا۔ آصف علی زرداری

لاہور ۔ پیپلز پارٹی کے شریک چیئرمین آصف علی زرداری نے کہاہے وہ وقت دور نہیں جب ایوان صدر میں بھی سلمان تاثیر جیسا پیپلزپارٹی کا صدر بیٹھا ہوگا۔ہم جانتے ہیں کہ لانگ مارچ کسے کہتے ہیں جب ہم لانگ مارچ کریں گے تو پورا پاکستان دیکھے گا کہ یہ صرف میلہ نہیں لانگ مارچ ہو گا۔پیپلزپارٹی کے جیالے اور لیڈر تھکے نہیں بلکہ ہم وقت کا انتظار کر رہے ہیں ہماری طاقت دنیا جانتی ہے کسی کو دکھانے کی ضرورت نہیں ۔ ہم جان دینا بھی جانتے ہیں اور جان لینا بھی جانتے ہیں اور نظام بدل کر بی بی کی شہادت کا بدلہ لیں گے۔ہمیں کسی کو بتانے یا سرٹیفکیٹ کی ضرورت نہیں کہ ہم محب وطن ہیں ہم ملک کو غاصبوں اور جمہوریت کے دشمنوں سے نجات دلوائیں گے۔ملک میں مکمل جمہوریت کس روز ہو گی اس کا فیصلہ ہم کریں گے محترمہ بے نظیر بھٹو شہید نے بلاول بھٹو زرداری کو ہمارے لئے تحفہ کے طور پر چھوڑا ہے۔ ان خیالات کا اظہار انہوں نے آج گورنر ہاؤس لاہور میں پارٹی کارکنوں سے خطاب کرتے ہوئے کیا ۔اس موقع پر گورنرز پنجاب سلیمان تاثیر نے بھی خطاب کیا۔ آصف علی زرداری نے خطاب کرتے ہوئے کہاکہ یہ گورنر ہاؤس وہ جگہ ہے جہاں مجھے اس دن گرفتار کیا گیاتھا جب ایک غاصب اور لغار نے جمہوریت پر شب خون مارا تھا اور شب خون کے نتیجے میں جمہوریت او رپاکستان کو شدید نقصان پہنچا ہے جو اس وقت جمہوریت کے مجرم تھے وہ آج بھی جمہوریت کے مجرم ہیں اورانہی مجرموں نے ہم سے بی بی کو چھیناہے ہم ان جمہوریت کے مجرموں کو کہتے ہیں کہ یہ بازی خون کی بازی ہے یہ بازی تم ہی ہارو گے ہر گھر سے بھٹو نکلے گا تم کتنے بھٹو مارو گے ۔ انہوں نے کہاکہ ہماری پارٹی وہ واحد پارٹی ہے جو اپنا سر فخر سے بلند کر کے یہ کہہ سکتی ہے کہ ہم شہیدوں کے وارث ہیں اور ہم نے اس ملک کیلئے اپنا خون دیا ہے ہم اس طرز پر جیئں گے جس کا سبق ہمیں ذوالفقار علی بھٹو نے دیاہے۔ہمیں کسی کو اپنے محب وطن ہونے کے بارے میں بتانے یاکسی سرٹیفکیٹ کی ضرورت نہیں۔پاکستان کو جمہوریت پیپلز پارٹی نے سکھائی ہے اگر اب بھی کسی غاصب اور جمہوریت کے ڈاکو سے جنگ کی تو وہ پیپلز پارٹی ہی کرے گی ہم یہ چیلنج قبول کرتے ہیں ہم جمہوریت کو غاصبوں سے نجات دلائیں گے اور پاکستان کو ایک جمہوری ملک بنائیں گے ۔ انہوں نے کہاکہ یہ کب او رکس طرح ہو گا اس کا فیصلہ پیپلز پارٹی خود کرے گی 21جون کو بے نظیر بھٹو کی سالگرہ کے موقع پر خون کا عطیہ دے کر ہم دشمن کو بتائیں گے کہ ہم جمہوریت پسند لوگ ہیں ۔ہمارے پاس بی بی صاحبہ کا دیا ہوا ایک بھٹو موجود ہے جس کا نام بلاول بھٹو زرداری ہے وہ ہمارے لئے یہ تحفہ چھوڑ گئیں ہیں تاکہ گورنر ہاؤس اور ایوان صدر میں جیئے بھٹو کے نعرے لگتے رہیں وہ وقت دور نہیں جب ایوان صدر میں پیپلز پارٹی کاسلمان تاثیر جیسا صدر بیٹھا ہوگا۔ ہم ملک میں جمہوریت لا کر بی بی کا بدلہ لیں گے اور پنجاب میں بیٹھ کر بی بی کے پاکستان کو بچائیں گے اسی لئے ہم کہتے ہیں کہ پاکستان کھپے ۔ کوئی یہ نہ سمجھے کہ پیپلز پارٹی کے جیالے اورلیڈر کمزور ہیں ہم نہ کمزور ہیں اور نہ تھکے ہیں بلکہ وقت کا انتظار کر رہے ہیں ہم جانتے ہیں کہ لانگ مارچ کسے کہتے ہیں اور جب ہم لانگ مارچ کریں گے تو پورے پاکستان کو معلوم ہو جائے گا کہ لانگ مارچ کیسے ہوتا ہے یہ میلہ نہیں ہوتا ۔ انہوں نے کہا کہ لانگ مارچ صرف بے نظیر کا خون ہی کر سکتا ہے آصف علی زرداری نے کہا کہ تمہارے پاس وہ اُمنگیں ، خون اور نظریہ نہیں ہے جو پیپلز پارٹی کے پاس ہے ۔قائداعظم نے یہ ملک ڈائیلاگ کے ذریعے بنایا اورہم بھی پاکستان میں ڈائیلاگ کے ذریعے جمہوریت لائیں گے ہماری طاقت دنیا جانتی ہے کسی کو دکھانے کی ضرورت نہیں