تمام اتحادی جماعتوں کا ٥ وزارتوں پر اتفاق ہو گیا

مخدوم شاہ محمود قریشی وزیر خارجہ اور اسحاق ڈار وزیر خزانہ ہوں گے
شیری رحمن اطلاعات و نشریات خورشید شاہ پارلیمانی امور اور فاروق نائیک وزارت قانون کا قلمدان سنبھالیں گے
حسین حقانی اور رحمان ملک کو بالترتیب وزارت خارجہ اور وزارت داخلہ میں مشیر تعینات کیا جا ئے گا ۔ ذرائع
اسلام آباد۔ وفاقی کابینہ جو رواں ہفتے تشکیل پانے والی ہے نئی حکومت میں پیپلز پارٹی کے رہنما مخدوم شاہ محمود قریشی وزارتِ خارجہ اور پاکستان مسلم لیگ کے اسحاق ڈار وزارتِ خزانہ کا قلمدان سنبھالیں گے۔ بی بی سی کے مطابق پاکستان پیپلز پارٹی کی زیر قیادت تشکیل پانے والی مخلوط حکومت کے قریبی ذرائع نے بتایا ہے کہ اب تک پانچ اہم وزراتوں پر اتفاق رائے ہو گیا ہے جبکہ دیگر وزارتوں کی تقسیم پر ابھی حتمی مشاورت باقی ہے۔ جن پانچ وزارتوں پر اتفاق ہوا ہے ان میں وزارت خارجہ اور خزانہ کے علاوہ داخلہ، اطلاعات اور پارلیمانی امور شامل ہیں۔وزراتِ اطلاعات و نشریات کی باگ ڈور شیری رحمان اور وزارتِ پارلیمانی امور کی ذمہ داریاں سید خورشید شاہ سنبھالیں گے۔ بین الاقوامی امور کے تجزیہ نگار حسین احمد حقانی کو وزارت خارجہ میں جبکہ وفاقی تحقیقاتی ادارے ایف آئی اے کے سابق سربراہ رحمان ملک کو نئی کابینہ میں وزارتِ داخلہ کا مشیر مقرر کیا جائے گا۔ توقع ہے کہ وزارتِ قانون فاروق ایچ نائک کو ملے گی۔ لیکن پیٹرولیم، دفاع، صحت، تعلیم اور پانی و بجلی سمیت بعض وزارتوں کے لیے معاملات آئندہ چوبیس گھنٹوں میں طے ہوجائیں گے۔ اطلاعات کے مطابق پیٹرولیم اور صحت کی وزارت مسلم لیگ (ن) مانگ رہی ہے جبکہ پانی و بجلی عوامی نیشنل پارٹی مانگ رہی ہے۔ ذرائع کے مطابق مولانا فضل الرحمٰن وزارت مذہبی امور اور قومی اسمبلی کی خارجہ کمیٹی کی چیئرمین شپ مانگ رہے ہیں۔ اس بارے میں ابھی حتمی مشاورت باقی ہے۔ پیپلز پارٹی کے اعلیٰ ذرائع کا کہنا ہے کہ کابینہ کی تشکیل تین سے چار مرحلوں میں مکمل ہوگی اور پہلے مرحلے میں درجن بھر کے قریب وزیر حلف اٹھائیں گے۔ واضح رہے کہ حکومت سازی اور کابینہ کو حتمی شکل دینے کے بارے میں بات چیت کے وقت جو فارمولہ طے پایا تھا اس میں پیپلز پارٹی کے میاں رضا ربانی نے بتایا تھا کہ چھ قومی اسمبلی کی سیٹوں پر ایک وزارت دی جائے گی۔ ادھر ثناء نیوز کو اپنے ذرائع سے معلوم ہوا ہے کہ خارجہ امور کے تجزیہ نگار حسین احمد حقانی کو وزارت خارجہ میں مشیر مقرر کرنے کا فیصلہ کر لیاگیا ہے۔ حسین احمد حقانی کا پیپلز پارٹی کے سربراہ اور سابق وزیراعظم بے نظیر بھٹو کی زندگی میں قریبی اور بااعتماد ساتھیوں میں شمار ہوتا تھا جبکہ اب وہ آصف علی زرداری اور پارٹی کے دیگر رہنماؤں کے انتہائی قریبی معتمدین میں شامل ہیں حسین احمد حقانی نے اسلامی جمہوری اتحاد سے اپنے سیاسی سفر کا آغاز کیاتھابعد ازاں وہ پیپلز پارٹی میں شامل ہو گئے بے نظیر بھٹو حسین احمد حقانی سے اہم امور کے بارے میں مشاورت کیا کرتی تھیں۔ قبل ازیں انہیں امریکہ میں سفیر مقرر کئے جانے کا سوچا جارہاتھا تاہم خارجہ امور پر گہری نظر رکھنے کے سبب انہیں مشیر وزارت خارجہ مقرر کئے جانے کا فیصلہ کیا گیا ہے