کراچی بم دھماکوں میں لسانی تنظیم ملوث ہے۔ آئی جی سندھ

کراچی کے کسی مدرسے میں دہشت گردی کی تربیت نہیں دی جا رہی دو ہفتوں میں 26 مغوی بازیاب کرائے گئے جبکہ سولہ ڈاکوؤں کو گرفتار کیا گیاسلطان صلاح الدین کا پریس کانفرنس سے خطاب
کراچی ۔ آئی جی سندھ سلطان صلاح الدین نے کہا ہے کہ کراچی بم دھماکوں میں لسانی تنظیم ملوث ہے جبکہ کراچی کے کسی مدرسے میں دہشت گردی کی تربیت نہیں دی جا رہی۔ لاڑکانہ میں اعلیٰ سطح کے اجلاس کے بعد نیوز کانفرنس کرتے ہوئے آئی جی نے کہا کہ قبائلی علاقوں سے کراچی نقل مکانی کرنے والوں کی سخت نگرانی کی جا رہی ہے۔ تاہم کراچی کے کسی مدرسے میں دہشت گردی کی تربیت نہیں دی جا رہی۔ ان کا کہنا تھا کہ کراچی بم دھماکوں میں لسانی تنظیم اور دیگر گروپ ملوث ہیں۔ انہوں نے کہا کہ گزشتہ دو ہفتوں میں 26 مغوی بازیاب کرائے گئے جبکہ سولہ ڈاکوؤں کو گرفتار کیا گیا۔ ان کا کہنا تھا کہ سندھ میں قیام امن کے لئے پولیس کو جدید اسلحہ اور ٹرانسپورٹ فراہم کی جائے گی۔