ایم کیو ایم کی اعلیٰ قیادت سے پیپلز پارٹی قیادت کے خلاف بیانات پر نوٹس لینے کا مطالبہ

کراچی ۔ صوبائی وزیر اطلاعات سندھ شازیہ مری نے ناظم کراچی کے بیان کو قابل مذمت او افسوسناک قرار دیتے ہوئے ایم کیو ایم کی اعلیٰ قیادت سے ایسے بیانات کا نوٹس لینے کا مطالبہ کیا ہے۔ کراچی میں ایک پریس کانفرنس سے خطاب کرتے ہوئے انہوں نے کہا کہ سٹی ناظم نے جو زبان استعمال کی وہ ناقابل قبول ہے۔ انہوں نے کہا کہ پیپلز پارٹی آئی ایس آئی کی پیداوار نہیں ہے۔ انہوں نے کہا کہ قائد عوام ذوالفقار علی بھٹو نے پاکستان کو ایٹمی قوت بنایا اور ہمیں فخر ہے کہ ہم پیپلز پارٹی کا حصہ ہیں۔ انہوں نے کہا کہ ملک میں ہم امن وامان چاہتے ہیں۔ پیپلزپارٹی نے ملک میں جمہوریت کے لیے اپنی قیادت قربان کی۔انہوں نے ایم کیو ایم کی قیادت سے مطالبہ کیا کہ ایسے بیانات کا نوٹس لیا جائے۔