ڈیرہ اسماعیل خان میں پولیس کی گشتی پارٹی پر ریموٹ کنٹرول بم حملہ ، ٤ پولیس اہلکاروں سمیت ٥ افراد جاں بحق ،١٣ زخمی

ڈیرہ اسماعیل خان ۔ ڈیرہ اسماعیل خان میں یونیورسٹی روڈ پر وینسم کالج کے قریب پولیس وین پر ریموٹ کنٹرول بم حملے کے نتیجے میں 4پولیس اہلکاروں سمیت 5جاں بحق اور 13زخمی ہو گئے ۔ زخمیوں میں بھی 6پولیس اہلکار شامل ہیں۔ تفصیلات کے مطابق جمعہ کی شب ڈیرہ اسماعیل خان کے نواحی علاقہ وانڈہ موچیاں والا میں نا معلوم مقام پر دھماکے کی چیکنگ کیلئے پولیس وین جارہی تھی کہ وینسم کالج کے قریب ایک سائیکل پر بندھے ہوئے دھماکہ خیز مواد کے پھٹنے سے 4پولیس اہلکاروں سمیت 5افراد جاں بحق ہو گئے ۔ جن میں اے ایس آئی خادم حسین ، کانسٹیبل فتح خان ، اکرم اللہ ، وحید اللہ اور فضل نامی ایک شہری شامل ہیں ۔ دھماکے کے نتیجے میں ہیڈکانسٹیبل سعداللہ ،کانسٹیبل ممتاز ، کانسٹیبل وحید ، کانسٹیبل سرور سمیت 13افراد زخمی ہو گئے۔ جبکہ سلیمان خان ، اشرف خان اور دیگر شہری بھی شامل ہیں ۔لاشوں اور زخمیوں کو ڈسٹرکٹ ہیڈکوارٹر ہسپتال منتقل کر دیاگیاہے جہاں بجلی کی عدم فراہمی کے باعث زخمیوں کو طبی امداد کی فراہمی میں دشواری کا سامنا کرنا پڑا ۔زخمیوں میں بعض کی حالت نازک بتائی جاتی ہے