پرویز مشرف کے لئے محفوظ پناہ گاہ صرف اڈیالہ جیل ہی ہے ۔ فرید پراچہ

لاہور ۔ جماعت اسلامی پاکستان کے ڈپٹی سیکرٹری جنرل فرید احمد پراچہ نے کہا ہے کہ اب جبکہ خود امریکہ اور ترکی سمیت کوئی ملک بھی جنرل پرویز شرف کو پناہ دینے پر تیار نہیں اس صورت میں ان کے لئے محفوظ راستہ اڈیالہ جیل ہی ہے کیونکہ قانون اور انصاف کا سامنا ہی ہمیشہ محفوظ راستہ ہوتا ہے ۔ وہ جامع مسجد علماء اکیڈمی میں نماز جمعہ کے اجتماع سے خطاب کر رہے تھے ۔ انہوں نے کہا کہ پرویز مشرف قومی مجرم ہیں اور اس پر آئین پاکستان کے کم از کم 12 آرٹیکلز ، تعزیرات پاکستان کی 18 دفعات اور آرمی ایکٹ کی متعدد دفعات کے تحت مقدمہ چلانا ناگزیر ہے ۔ انہوں نے کہا کہ قوم کی طرف سے واضح مینڈیٹ ملنے کے بعد اب چیف جسٹس افتخار محمد چوہدری سمیت ججوں کو بحال کرنے اور پرویز مشرف کے محاسبہ کرنے میں جو سیاسی قوتیں عملا رکاوٹ بنی ہوئی ہیں وہ بھی قومی مجرم ہیں اور قوم کی نظر میں مشرف اور اس کی بیساکھیاں یکساں ہیں ۔