پرویز مشرف استعفیٰ نہیں دیں گے ان سے استعفیٰ لیا جائے گا جس طرح ان سے وردی اتروائی گئی ۔ ترجمان مسلم لیگ (ن)صدیق الفاروق

اسلام آباد ۔ مسلم لیگ(ن) کے ترجمان صدیق الفاروق نے کہا ہے کہ صدرپرویز مشرف استعفیٰ نہیں دیں گے ان سے استعفیٰ لیا جائے گا بالکل اسی طرح جس طرح ان سے وردی اتروائی گئی صدر کے استعفیٰ نہ دینے کے بیان پر اپنے رد عمل میں صدیق الفاروق نے کہا کہ پرویز مشرف خود تسلیم کر چکے ہیں کہ وہ غیر آئینی ہیں پرویز مشرف نے جتنے بھی اقدامات کیے ہیں وہ غیر آئینی ہے اگر پرویز مشرف غیر آئینی اقدامات اور پولیس کی طاقت کے ذریعے ججز کو معزول کر سکتے ہیں اور پوری قوم کو مسائل میں دھکیل سکتے ہیں تو ہمیں بھی یہ حق حاصل ہے کہ ہم اپنے آئینی اقدامات کے ذریعے ججوں کو بحال کر سکتے ہیں انہوں نے کہا کہ پرویز مشرف کا یہ کہنا کہ وہ استعفیٰ نہیں دیں گے نئی بات نہیں وہ استعفیٰ نہیں دیں گے بلکہ ان سے استعفیٰ اس طرح لیا جائے گا جس طرح ان سے وردی اتروائی گئی تھی انہو ںنے کہا کہ مسلم لیگ بھی مفاہمت چاہتی ہے لیکن ان اقدامات پر کوئی مفاہمت نہیں ہو سکتی جو پرویز مشرف کی طرف سے غیر آئینی طور پر اٹھائے گئے ہیں آصف علی زر داری کے بارے سوال پر صدیق الفاروق نے کہا کہ ان کی جماعت جمہوریت کے لئے موجودہ اتحاد کو بر قرار رکھنا چاہتی ہے ہمارا موقف یہی ہے کہ تمام معزول ججز بھوربن کے معاہدے کے تحت بحال ہوں صدیق الفاروق نے کہا کہ مسلم لیگ ن وکلاء کے 10جون کے لانگ مارچ کی بھرپور حمایت کرے گی۔