چھ دن میں ججز بحال نہ ہوئے تواے پی ڈی ایم کااجلاس بلاکر لائحہ عمل مرتب کریں گے،قاضی حسین احمد

پشاور ۔ جماعت اسلامی پاکستان کے امیر قاضی حسین احمد نے کہا ہے کہ اگر چھ دن میں ججز بحال نہ ہوئے تواے پی ڈی ایم کااجلاس بلاکر لائحہ عمل مرتب کریںگے۔ جسٹس افتخار محمد چوہدری کو قبل از وقت ریٹائر کرنے کی بھر پور مزاحمت کریںگے اور تمام ججوں کی بحالی کے بغیر کوئی فارمولا قبول نہیں کیا جائے گا۔وہ مسجد مہابت خان پشاور میں جمعہ کے اجتماع سے خطاب اور صحافیوں سے بات چیت کر رہے تھے۔ قاضی حسین احمد نے کہا ہے کہ مقررہ مدت میں جج بحال نہ ہونے کی صورت میں نواز شریف کو قوم کے سامنے جواب دینا ہوگا۔ انہوںنے کہا کہ حکومت معزول ججوں کی بحالی میں تاخیر اس لئے کر رہی ہے کہ امریکہ ایسا نہیں چاہتا۔ انہوںنے کہا کہ افتخار محمد چوہدری امریکہ کی ایما ء پر لاپتہ کیے جانے والے شہریوں کے بارے میں حکمرانوں سے پوچھ گچھ کررہے تھے جو امریکہ کے لئے ناقابل قبول تھا۔انہوںنے مردان دھماکے کی شدید مذمت کی اور کہا کہ بنیادی پالیسی تبدیلی کیے بغیر امن وامان بحال نہیں ہو سکتا۔امیر جماعت نے کہا کہ مغربی ممالک نے پاکستان کا محاصرہ کر لیا ہے اور اس کی سا لمیت کو خطرہ ہے۔ اس صورت حال سے نکلنے کے لئے حکمرانوں کو امریکہ سے اتحاد فی الفورختم کرنا ہوگا۔انہوںنے کہا کہ عدلیہ کو معزول کرنے سے انصاف کا قتل ہو گیا اور قوم کوانصاف ملنے کے لئے عوام کو بیدار ہوناہوگا۔ انہوںنے کہا کہ پاکستان واحد ملک ہے جہاں کی حکومت اپنے شہریوں کو دوسرے ممالک کے حوالے کر رہے ہیںاور دوسروںکی خوشنودی کے لئے بے گناہ لوگوں کا قتل عام کیا گیا۔قاضی حسین احمد نے کہا کہ منتخب حکومت جنرل مشرف کا جلد سے جلد مواخذہ کریں، ان سے جامعہ حفصہؓکے بچوں کے قتل عام کا حساب مانگا جائیگا۔ قاضی حسین احمد نے کہا کہ امریکہ کھل کر پاکستان کی جڑیں کاٹ رہا ہے اور ہمارادشمن ہے، جب تک اس کو دشمن نہیں سمجھا جائے گا اس کے مقابلے میں اپنا دفاع ممکن نہیںہوگا۔ انہوںنے ایران کی مثال دیتے ہوئے کہا کہ امریکہ اس کا بال بیگا بھی نہ کر سکا ہے کیونکہ وہاں عوام اور حکومت ایک ہے۔ انہوںنے کہا کہ ہماری بدقسمتی یہ ہے کہ انتخابات کے بعد تمام جماعتوں کے سربراہ امریکہ کے سفارتخانے میں گئے یہ خودمختاری اور آزادی کی منافی سیاست ہے۔ جماعت کے امیر نے کہا کہ امریکہ پوری دنیا میں مسلمانوں کا قتل عام کر رہے ہیں اور اسلامی ممالک کے حکمران بشمول پاکستان اس پر خاموش ہیں۔ انہوںنے سرحد حکومت پر تنقید کرتے ہوئے کہا کہ اس نے سب سے پہلا کام یہ کیا کہ خواتین کودوبارہ اشتہارات کاحصہ بنا یا۔ نیم برہنہ خواتین کی تصاویرہر گز پختون کلچر نہیں۔ انہوںنے کہا کہ آٹا ،چاول اور گھی مہنگا کر دیا گیا ہے۔ غریب فاقہ کشی پر مجبور ہیں۔ سرکاری خزانہ پر سب سے پہلا حق غریب کا ہے۔