٣٠ اپریل اعلان مری اور عدلیہ کی بحالی کا دن ہو گا ۔اعتزاز احسن

سپریم بار کونسل نے الیکشن لڑنے کی اجازت دے دی ہے تاہم پارٹی ٹکٹ پر الیکشن لڑوں گا
آئینی پیکج اور ججوں کی بحالی دو الگ معاملے ہیں آئینی پیکج کے حوالے سے معزول ججوں کی رائے سب سے مقدم ہے
سپریم بار کونسل کے صدر کا راولپنڈی آرٹس کونسل میں تقسیم انعامات کی تقریب سے خطاب
راولپنڈی ۔ سپریم کورٹ بار ایسوسی ایشن کے صدر بیرسٹر اعتزاز احسن نے کہا ہے کہ ملک بھر کے وکلاء اور 16 کروڑ عوام اپنی سیاسی قیادت کی طرف سے دی گئی 30 اپریل کی تاریخ کا بے صبری سے انتظار کر رہے ہیں ہمیں کسی کی نیت پر کوئی شک شبہ نہیں بلکہ توقع ہے کہ 30 اپریل اعلان مری اور عدلیہ کی بحالی کا دن ہو گا سپریم کورٹ بار نے مجھے این اے 55 سے الیکشن لڑنے کی اجازت دے دی ہے تاہم میں پارٹی ٹکٹ پر الیکشن لڑوں گا اگر آصف زرداری نے یہاں سے الیکشن میں حصہ لیا تو انہیں خوش آمدید کہوں گا آئینی پیکج اور ججوں کی بحالی دو الگ معاملے ہیں آئینی بیکج کے حوالے سے معزول ججوں کی رائے سب سے مقدم ہے ان خیالات کا اظہار انہوں نے جمعہ کے روز راولپنڈی آرٹس کونسل میں جناح انسٹیٹیوٹ آف انفارمیٹکس اینڈ کامرس کی سالانہ تقریب تقسیم انعامات سے خطاب اور صحافیوں سے گفتگو کر تے ہوئے کیا تقریب سے انسٹیٹیوٹ کے چیئر مین و سابق وزیر اعلیٰ کے مشیر راحت قدوسی نے بھی خطاب کیا ذرائع ابلاغ سے گفتگو کر تے ہوئے اعتزاز احسن نے کہا کہ آنے والا ہفتہ ملکی حالات میں مثبت پیش رفت کا پیش خیمہ ثابت ہو گا انہو ںنے کہا کہ ہمیں کسی کی نیت پر کوئی شک و شبہ نہیں ہے اور یقین ہے کہ اعلان مری پر پوری طرح عملدر آمد کیا جائے گا موجودہ حالات میں ہم کوئی ایسی بات نہیں کر نا چاہتے کہ کوئی وکلاء کی تحریک پر انگلی اٹھائے ایک سوال کے جواب میں انہو ںنے کہا کہ مجوزہ آئینی پیکج کا معزول ججوں کی بحالی سے کوئی تعلق نہیں یہ دونوں الگ معاملے ہیں تاہم آئینی پیکج کے مسئلے پر معزول ججوں سے مکمل مشاورت کی جائے گی کیونکہ اس حوالے سے ان کی رائے سب سے مقدم ہے انہوں نے کہا کہ ملک بھر کے وکلاء اور 16 کروڑ عوام 30 اپریل کی تاریخ کا بے صبری اور بے چینی سے انتظار کر رہے ہیں یہ تاریخ وکلاء نے نہیں بلکہ سیاسی عمائدین نے مقرر کی تھی ایک اور سوال کے جواب میں انہو ںنے کہا کہ راولپنڈی کے حلقہ این اے 55 سے الیکشن میں حصہ لینے اور پارٹی ٹکٹ کے حصول کے لئے پیپلز پارٹی کو درخواست دے رکھی ہے اگرچہ یہ سیٹ نواز شریف کی ہے لیکن انہو ںنے مجھے اس کی پیش کش کی ہے تاہم میں پارٹی ٹکٹ پر الیکشن میںحصہ لوں گا لیکن اگر آصف علی زر داری نے اس حلقہ سے الیکشن لڑا تو انہیں خوش آمدید کہوں گا انہوں نے کہا کہ سپریم کورٹ بار ایسوسی ایشن نے انہیں اتفاق رائے سے الیکشن لڑنے کی اجازت دے دی ہے تا کہ کامیاب ہو کر عدلیہ کی بحالی کے معاملے کو موثر انداز میں پارلیمنٹ میں اٹھا سکوں قبل ازیں تقریب سے خطاب کر تے ہوئے انہو ںنے کہا کہ قائد اعظم پاکستان کو مکمل فلاحی ریاست بنانا چاہتے تھے لیکن ہم نے اسے کبھی فلاحی ریاست نہیں بننے دیا پے در پے مارشل لاء کی حکومتوں نے فلاحی ریاست کو قومی سلامتی کی ریاست میں تبدیل کر دیا جہاں پر عوام کی فلاح و بہبود کے بجائے ہمیشہ فوج کو مقدم رکھا گیا انہو ںنے کہا کہ 40 ہزار ایٹم بم کی حامل فوجی قوت و ریاست روس بھی ا سلئے تباہ ہو گئی کہ اس کے عوام بد حال تھے انہو ںنے کہا کہ یورپ و امریکہ ہمارے لئے لاکھ برے سہی لیکن وہ اپنے عوام کے حقوق و مفادات کے محافظ ہیں انہوں نے کہا کہ پاکستان میں ریاستی ادارے 58 سال سے فوجی آمریت کے تسلط میں ہیں لیکن دو سال سے وکلاء عدلیہ سمیت ان اداروں کی آزادی کی جنگ لڑ رہے ہیں کیونکہ عدل کے بغیر جمہوریت اور پارلیمان نہیں چل سکتے۔