جنرل(ر) مشرف کی زیر نگرانی حکومت میں شامل نہیں ، کوئی بیٹھا ہے تو بیٹھا رہے اسے بھیجنے کا کوئی شوق نہیں ، تہمینہ دولتانہ

ملتان ۔ وفاقی وزیر سائنس و ٹیکنالوجی تہمینہ دولتانہ نے کہاہے کہ ہم جنرل (ر) مشرف کے زیر نگرانی حکومت میں شامل نہیں ہیں کیونکہ اب حکومت میں اختیارات وزیراعظم کے پاس زیادہ ہیں کوئی بیٹھا ہے تو اپنی جگہ بیٹھا رہے ہمیں بھی اسے بھیجنے کا کوئی شوق نہیں ہے وہ آج ملتان ایئر پورٹ پر صحافیوں سے گفتگو کر رہی تھیں بیگم تہمینہ دولتانہ نے کہاکہ ملک نے اگر ترقی کرنا ہے تو سائنس و ٹیکنالوجی کو ترقی دینا ہوگی موجودہ حالات میں ملکی ترقی ممکن نہ ہے جب تک ہم آلو سے چپس بنا کر مارکیٹنگ نہ کریں گے انہوں نے کہاکہ ٹیکسٹائل انڈسٹری سمیت تمام مشینری باہر سے ہم سیکنڈ ہینڈ خریدتے ہیں جو کچھ ہی عرصہ بعد ختم ہو جاتی ہے ہمیں خود ایسی مشینری بنانا ہو گی اور ٹیکنالوجی کو فروغ دینا ہو گا عوام کو صاف پانی اور کھانے کی اشیاء فراہم کرنا بھی ٹیکنالوجی کو بہتر بنانے سے ہو گا ہمیں سائنس کو لیبارٹریوں سے باہر نکال کر عوام تک پہنچانا ہو گی انڈسٹری کو اپ گریڈ کرنا ہو گا نوجوانوں کو ملازمتیں دینا ہوں گی ایک سوال کے جواب میں انہوں نے کہاکہ ججز کی بحالی کے حوالے سے دن نہ گنیں وہ ضرور بحال ہوں گے دو دن اوپر ہو سکتے ہیں یا دو دن پہلے ہوسکتے ہیں ہمارے پاس جادو کی کوئی چھڑی نہیں ہے کہ راتوں رات تمام مسائل حل کریں ڈاکٹر قدیر کی رہائی کے حوالے سے سوال کے جواب میں انہوں نے کہاکہ ہمارے پاس جادو کی چھڑی نہیں ہے دل تو یہی چاہتا ہے کہ تمام مسائل فوراً حل ہو جائیں اور ہم ان مسائل کو حل بھی کریں گے مگر قدم بہ قدم حل کریں گے ۔