میاں نواز شریف سے چوہدری نثار علی خان ، اسحاق ڈار اور خواجہ محمد آصف کی پنجاب ہاؤس میں اہم ملاقات

اسلام آباد۔ پاکستان مسلم لیگ (ن) کے قائد محمد نواز شریف سے جمعہ کو ججز کی بحالی کے حوالے سے کمیٹی میں مسلم لیگ (ن) کے اراکین چوہدری نثار علی خان ، اسحاق ڈار اور خواجہ محمد آصف نے پنجاب ہاؤس میں اہم ملاقات کی ذرائع کے مطابق میاں محمد نواز شریف نے پارٹی رہنماؤں کو ہدایت کر دی ہے کہ وہ کسی صورت ججز کی بحالی کے موقف میں کوئی لچک پیدا نہیں کریں گے اس ضمن میں اقتدار کی بھی پرواہ نہیں کی جائے گی نواز شریف نے کمیٹی میں پارٹی کے اراکین کو ہدایت کی کہ اس ضمن میں پاکستان پیپلز پارٹی کو مسلم لیگ کے حتمی موقف سے آگاہ کر دیا جائے مقررہ وقت میں ججز کی بحالی کے معاملے پر سمجھوتہ نہیں کیاجاسکتا۔پارٹی رہنماؤں نے نواز شریف کو کمیٹی کے حوالے سے ممکنہ صورتحال سے بھی آگاہ کیا۔ نواز شریف نے پارٹی رہنماؤں کو ہدایت کی کہ وہ موقف پر ڈٹ جائیں مسلم لیگ (ن) کو وزارتوں کی پرواہ نہیں ہے۔اعلان مری کے حوالے سے قوم کو مایوس نہیں کریں گے نواز شریف سے ملاقات کے بعد مسلم لیگ (ن) کے اراکین کمیٹی کے اجلاس میں شرکت کیلئے پارلیمنٹ ہاؤس پہنچے ادھر ایک نجی ٹی وی نے ذرائع کے حوالے سے بتایا ہے کہ مقررہ وقت میں دونوں بڑی جماعتوں کے درمیان ججز کی بحالی پر اتفاق نہ ہوا تو پاکستان مسلم لیگ (ن) یکم مئی تک وفاقی حکومت سے الگ ہو جائے گی پاکستان مسلم لیگ (ن) کے وفاقی وزراء تیس اپریل تک وفاقی کابینہ میں شامل رہیں گے ڈیڈ لائن کے مطابق ججز بحال نہ ہونے پر مسلم لیگ (ن) کے وزراء مستعفی ہو جائیں گے ۔