وزیر اعلٰی سندھ نہیں ، سندھ کابینہ میں تبدیلی کا امکان ہے۔ ۔ ۔ نثارکھوڑو

لاڑکانہ ۔ سندھ اسمبلی کے اسپیکر نثار کھوڑو نے کہا ہے کہ وزیر اعلیٰ سندھ کو تبدیل نہیں کیا جارہا ہے تاہم سندھ کابینہ میں تبدیلی کا امکان ہے۔سندھ اسمبلی کے اسپیکر نثار کھوڑو نے لاڑکانہ میں اپنی رہائش گاہ پرنجی ٹی وی سے بات چیت کرتے ہوئے کہا کہ وزراء کی کارکردگی پر چیک اینڈ بیلنس رکھنا ضروری ہوتا ہے تاکہ ان کی کارکردگی سے عوام کو فائدہ ہو۔ نثار کھوڑو نے کہا کہ سندھ کابینہ میں تبدیلی کا امکان موجود ہے تاہم وزیر اعلیٰ سندھ کو تبدیل نہیں کیا جارہا۔ایک سوال کے جواب میں انہوں نے کہا کہ این ایف سی ایوارڈ سے صوبوں کے مسائل کا خاتمہ ہونے کے ساتھ مالی مشکلات بھی حل ہوں گی۔ ان کاکہنا تھا کہ 1998 ء کے بعد سے مردم شماری نہیں ہوئی ،اس لئے اس سال مردم شماری کرکے این ایف سی ایواڑد دیا جانا چاہئے اور یہ ایوارڈ وصولیوں، مردم شماری،غربت اور رقبے کو مدنظر رکھتے ہوئے تقسیم ہونے چاہئیں۔