خورشید شاہ نے ڈاکٹر قدیر کو پابند سلاسل رکھنے کے بارے میں سوال کا جواب دینے سے معذوری ظاہر کر دی

اسلام آباد۔ وفاقی وزیر محنت و افرادی قوت سید خورشید شاہ نے جمعہ کو قومی اسمبلی میں قومی ہیرو اور ایٹمی سائنس دان ڈاکٹر عبد القدیر خان کو پابند سلاسل رکھے جانے کے بارے میں سوال کا جواب دیتے ہوئے معذوری ظاہر کر دی وقفہ سوالات میں ایوان میں سائنس و ٹیکنالوجی کے شعبہ کی ترقی سے متعلق گزشتہ پانچ سالوں کے دوران کئے گئے اقدامات کے بارے میں چوہدری محمد برجیس طاہر نے ضمنی سوال کیاکہ ایٹمی سائنسدان جس نے ملک کے دفاع کو ناقابل تسخیر بنایا انہیں حکومت کب رہا کرے گی۔ وفاقی وزیر سید خورشید شاہ نے کہاکہ وہ اس معاملے سے آگاہ نہیں ہیں بد قسمتی سے وہ اس سوال کا جواب نہیں دے سکتے ۔ متعلقہ وزیر اس کا آئندہ اجلاس میں جواب دیں گے۔ ایسا نہ ہو سکا تو وہ خود معلومات حاصل کر کے ایوان کو آگاہ کریں گے۔ تاہم ابھی کچھ نہیں بتا سکتے۔ ڈپٹی سپیکر فیصل کریم کنڈی نے یہ معاملہ آئندہ اجلاس کے لیے موخر کر دیا۔