مضبوط پاکستان سعودی عرب کی طاقت ہے ہم خوشحال ، خودمختار اور ترقی یافتہ پاکستان دیکھنا چاہتے ہیں ۔سعودی سفیر کا خطاب

اسلام آباد ۔ وزیراعظم سید یوسف رضا گیلانی نے کہا ہے کہ پاکستان اور سعودی عرب کے درمیان گہرے مثالی برادرانہ تعلقات ہیں پاکستان کی معاشی ترقی کیلئے سعودی عرب کا کردار قابل تعریف ہے ہم سعودی عرب کی ترقی اور خوشحالی کو اپنی طاقت سمجھتے ہیں جبکہ سعودی عرب کے سفیر العواد العسیری نے کہاہے کہ مضبوط پاکستان سعودی عرب کی طاقت ہے۔ تعاون اور تعلقات کو مزید وسعت دی جائے گی ۔ ان خیالات کا اظہار انہوں نے منگل کو اسلام آباد میں سعودی عرب کے سفارتخانے کی نئی عمارت کے افتتاح کے موقع پر کیا ۔ وزیراعظم سید یوسف رضا گیلانی نے سعودی سفارتخانے کی نئی عمارت کا افتتاح کیا تقریب میں پاکستان مسلم لیگ (ن) کے قائد وسابق وزیراعظم میاں محمد نواز شریف ، پی پی پی کے شریک چیئرمین آصف علی مرداری ، جمعیت علماء اسلام (ف) کے سربراہ مولانا فضل الرحمن ، جماعت اسلامی پاکستان کے سربراہ قاضی حسین احمد ، پاکستان مسلم لیگ (ن) کے صدر شہباز شریف ،قومی اسمبلی کی سپیکر ڈاکٹر فہمیدہ مرزا، وزیر خارجہ شاہ محمود قریشی اور دیگر وفاقی وزراء اور اہم شخصیات نے شرکت کی ۔ تقریب سے خطاب کرتے ہوئے وزیراعظم نے کہاکہ پاکستان اور سعودی عرب کے تعلقات مثالی ہیں انہوں نے کہاکہ اسلام آباد میں سعودی عرب کا نیا سفارتی کمپیلکس دونوں ممالک کے دوستانہ تعلقات میں فروغ ، مزید پیشرفت میں اہم سنگ میل ثابت ہو گا وزیراعظم نے کہاکہ پاک سعودی عرب دو طرفہ تجات اور سرمایہ کاری میں مزید اضافہ ہونا چاہیے پاکستان کی نئی حکومت کی ترجیحات کے حوالے سے وزیراعظم نے کہاکہ حکومت کی اولین ترجیح اقتصادی ترقی ، سیاسی استحکام اور امن وامان کا قیام ہے اور ہم اپنے اتحادیوں کے ساتھ مل کر اس مقصد کے حصول کیلئے کوشاں ہیں وزیراعظم نے کہاکہ وقت کے ساتھ دونوں برادر اسلامی ممالک کے تعلقات کو فروغ حاصل ہو رہاہے۔ وزیراعظم نے مزید کہاکہ پاکستان سعودی عرب کی ترقی اور خوشحالی کو اپنی طاقت سمجھتا ہے وزیراعظم نے کہاکہ پاکستان اور سعودی عرب ایک دوسرے کی سلامتی اور استحکام میں گہری دلچسپی لیتے ہیں اور مختلف عالمی اور علاقائی امور کے بارے میں دونوں ممالک کے درمیان یکساں موقف پایا جاتا ہے ۔ انہوں نے کہاکہ ہمیں مسلم اُمہ کو درپیش چیلنج کا مکمل ادراک ہے او رہم ان چیلنجز کا مقابلہ کرنے کیلئے پرعزم ہیں ۔ وزیراعظم نے کہاکہ پاکستان سعودی عرب کے ساتھ مختلف شعبوں بالخصوص تجارت اور سرمایہ کاری میں دو طرفہ تعاون کو مزید بڑھانا چاہتا ہے اور اس سلسلے میں سعودی عرب کے دورے کے منتظر ہیں پاکستان میں تعینات سعودی عرب کے سفیر علی عواد العسیری نے کہاکہ ہر سعودی باشندہ پاکستان کو اپنا گھر سمجھتا ہے پاکستان کا استحکام پوری امُہ کا استحکام ہے اورہم خوشحال ، خودمختار اور ترقی یافتہ پاکستان دیکھنا چاہتے ہیں۔ دونوں ممالک کے قریبی دوستانہ تعلقات کو اجاگر کیا او رکہاکہ سعودی عرب پاکستان کی معاشی و اقتصادی ترقی کیلئے کوشاں ہے مضبوط پاکستان سعودی عرب کی طاقت ہے ہم پاکستان میں استحکام چاہتے ہیں ۔