ملک میں کسی سازش کو کامیاب نہیں ہونے دینگے‘ ججز کی بحالی تک ہماری جنگ جاری رہے گی ۔میاں شہباز شریف

ڈیرہ اسماعیل خان۔ مسلم لیگ کے قائد میاں شہباز شریف نے کہا ہے کہ ملک میں کسی سازش کو کامیاب نہیں ہونے دینگے‘ ججز کی بحالی تک ہماری جنگ جاری رہے گی یہ جنگ ملک کے کروڑوں عوام کی جنگ ہے۔ ان خیالات کا اظہار انہوں نے ڈیرہ ایئرپورٹ سے لاہور روانگی کے موقع پر مسلم لیگ (ن) ڈیرہ کے ضلعی پریس سیکرٹری چوہدری ریاض ایڈووکیٹ‘مسلم لیگ (ن) کے رہنما نواب ایزد نواز سدوزئی‘ مسلم لیگ یوتھ ونگ کے سابق صوبائی سینئر نائب صدر نعیم خان وزیر اور امتیاز قریشی سے اپنی خصوصی ملاقات میں کیا۔ ان رہنماؤں نے ان سے پارٹی امور پر بات چیت کی۔ میاں شہباز شریف نے کہا کہ اب ملک میں آئین وقانون کی حکمرانی ہو گی مسلم لیگ اصولوں کی سیاست پر یقین رکھتی ہے۔ وزارتیں ہماری منزل ہرگز نہیں اب حکومت کی حمایت یا مخالفت ایشوز کی بنیاد پر ہو گی‘ مسلم لیگ ملک کی بڑی جماعت ہے جو عوام کو تنہا نہیں چھوڑے گی۔