محسود قبائل کو ایک ماہ میں غیر ملکیوں کو نکالنا ہوگا،15نکاتی معاہدہ تیار

نیویارک:حکومت نے قبائلی عمائدین کے ذریعے عسکریت پسندوں سے ڈیل کرنے کے لئے 15نکاتی معاہدہ تیار کرلیا ہے، جس کے تحت جنوبی وزیرستان سے سکیورٹی فورسز کی مرحلہ وار واپسی ہوگی اور قیدیوں کا تبادلہ کیا جائے گا، بیت اللہ محسود گروپ کے ترجمان کے مطابق ان کے گروپ کی تحویل میں 100سے زائد سکیورٹی اہلکار اور سرکاری افسران موجود ہیں جن کو ڈیل طے پا جانے پر جرگے کے ذریعے رہا کیا جائے گا، محسود قبائل میں فرنٹیئر کور کو نقل و حرکت کی اجازت ہوگی۔ نیویارک ٹائمز میں شائع ہونیوالی رپورٹ میں اس کے نمائندے نے دعویٰ کیا ہے کہ معاہدے کا مسودہ اس نے دیکھا ہے جس میں محسود قبائل کو حملے بند کرنے، سرکاری افسران اور سکیورٹی اہلکاروں کے اغوا کو روکنے اور سڑکیں کھولنے کیلئے کہا گیا ہے ، ڈرافٹ میں امریکا اوردیگر کے دباؤ کے حوالے سے یہ بھی کہا گیا ہے کہ کسی اندرونی یا بیرونی دباؤ پر معاہدے کو ختم نہیں کیا جائے گا، وائٹ ہاؤس کی ترجمان ڈاناپیر ینو نے کہا کہ ہمیں اس پر تشویش ہے ، ہم دہشت گردوں کے خلاف جنگ اور جاری فوجی آپریشن کو معطل نہ کرنے کی حوصلہ افزائی کریں گے، سفارتکاروں اور افغان حکام کا کہنا ہے کہ حکومت استحکام پیدا کرنے کیلئے خیر سگالی کا راستہ اختیار کررہی ہے، حکام نے اسلام آباد میں بتایا کہ آصف علی زرداری نے معاہدے کے مسودے کی منظوری دیدی ہے اور اس کو ملٹری اسٹیبلشمنٹ کی حمایت بھی حاصل ہے ، پی پی ترجمان فرحت اللہ بابر کا کہنا ہے کہ ڈیل فائنل نہیں ہوئی، آصف زرداری نے محسود کے سیز فائر کے اعلان کا خیر مقدم کیا ہے، مذاکرات جاری ہیں، محسود کے بینظیر قتل میں ملوث ہونے کے متعلق انہوں نے کہا پیپلز پارٹی نے بیت اللہ محسود کا نام نہیں لیا تھا، ڈرافٹ کے مطابق محسود قبائل غیر ملکی عسکریت پسندوں کو مستقبل میں علاقے سے نکالنا ہوگا، نیو یارک ٹائمز کی رپورٹ کے مطابق غیر ملکی عسکریت پسندوں کو معاہدے پر دستخط کے ایک ماہ کے اندر نکالنا ہوگا اور اس اچھے کام کے لئے ایک ماہ کی توسیع بھی دی جاسکتی ہے، رپورٹ کے مطابق وہ علاقے کو ملک دشمن سرگرمی کیلئے استعمال نہیں ہونے دیں گے، محسود علاقے میں ترقیاتی کاموں میں مدد کریں گے، حکومتی اتھارٹی کا احترام کریں گے،حکام کے مطابق عوامی نیشنل پارٹی کے سربراہ اسفند یار ولی نے اتحادیوں کو بریفنگ دی اور ان کی حمایت حاصل کی ، ایک افسر نے بتایا کہ 2اپریل کو جنرل اشفاق پرویز کیانی نے وزیراعظم گیلانی اورحکمراں اتحاد کے رہنماؤں کو بتایا کہ فوج عسکریت پسندوں سے امن مذاکرات سمیت سیاسی قیادت کے اقدامات کی حمایت کرے گی، مسودے کے مطابق معاہدے پر جنوبی وزیرستان کے پولیٹیکل ایڈمنسٹریٹر اور محسود قبائل کے عمائدین دستخط کریں گے، جس کے بعد قیدیوں کا تبادلہ اور محسود علاقوں سے مرحلہ وار فوج کی واپسی ہو سکتی ہے، محسود کے ترجمان مولوی عمر نے نامعلوم مقام سے ٹیلی فون پر بتایا کہ جاری مذاکرات کے نتیجے میں جنوبی وزیرستان کے محسود علاقوں سے فوج کی واپسی شروع ہو گئی ہے، تاہم پاک فوج کے ترجمان میجر جنرل اطہر عباس نے اس کی تردید کی اور کہا کہ ابھی نہیں کیونکہ ہمیں اس سلسلے میں حکومتی احکامات موصول نہیں ہوئے،انہوں نے کہا صوبہ سرحد میں امن بحال کرنے کیلئے مذاکرات ہو رہے ہیں ، جہاں حکومت نے مالا کنڈ میں عسکریت پسند رہنماؤں سے الگ معاہدے پر دستخط کئے ہیں ، مولوی عمر نے بتایا کہ معاہدے کی توثیق کے لئے ایک گرینڈ جرگہ منعقد کیا جائے گا، انہوں نے کہا کہ ہماری طرف سے مکمل عمل درآمد ہوگا۔