چین میں پاکستان کے سفیر سلمان بشیر سیکرٹری خارجہ مقرر

اسلام آباد: چین میں پاکستان کے سفیر سلمان بشیر کو سیکرٹری برائے وزارت خارجہ امور مقرر کر دیا گیا۔ گزشتہ روز ان کی تقرری کا نوٹیفیکیشن جاری کر دیا گیا۔ قبل ازیں سیکرٹری خارجہ ریاض احمد خان کا کنٹریکٹ جمعہ کو منسوخ کر دیا گیا۔دریں اثناء نمائندہ جنگ کے مطابق ایم ڈی سروے آف پاکستان اورڈی ایم جی کے گریڈ21کے افسرنیئر آغا کو بین الصوبائی رابطہ ڈویژن کاایڈیشنل سیکرٹری انچارج لگایاگیا ہے۔ پاکستان ہاؤسنگ اتھارٹی کے منیجنگ ڈائریکٹر اورڈی ایم جی کے گریڈ21کے افسر سمیع الحق خلجی کو ایڈیشنل سیکرٹری انچارج سپورٹس ڈویژن تعینات کیاگیاہے۔ ڈی جی نارا اورڈی ایم جی کے گریڈ21کے افسر محسن حقانی کی خدمات سندھ حکومت کے سپرد کردی گئی ہیں۔ ڈپٹی سیکرٹری دفاع اورسیکرٹریٹ گروپ کے گریڈ19کے افسر محمد رشید شیخ 12 اگست کو ملازمت سے ریٹائر ہوجائیں گے۔ اسٹیبلشمنٹ ڈویژن نے تبادلوں کاباضابطہ نوٹیفیکیشن جاری کردیا ہے ۔ پولیس گروپ کے گریڈ17کے تین افسروں عبد السلام، فرخ بشیر اوریونس چانڈیو کو گریڈ18میں ترقی دے دی گئی ہے وہ ترقی پانے کے بعد بدستور سندھ حکومت میں ہی فرائض انجام دیں گے۔