ملاوٹ سے پاک جمہوریت کیلئے جدوجہد کررہے ہیں،عدلیہ جلد بحال ہوگی،نواز شریف

اسلام آباد : پاکستان مسلم لیگ(ن) کے قائد سابق وزیراعظم محمد نواز شریف نے کہا ہے کہ علاقائی اقتصادی مسائل حل کرنے کیلئے پاکستان، بھارت، وسطی ایشیائی ریاستوں سمیت تمام ممالک کو ہاتھوں میں ہاتھ ڈال کر آگے بڑھنا ہوگا۔ جمعہ کو پنجاب ہاؤس میں بھارتی وزیر تجارت مرلی دیوار سے بات چیت کرتے ہوئے انہوں نے کہا کہ آئین اور جمہوریت کے تسلسل کے نتیجے میں بھارت ترقی یافتہ ملکوں کی صف میں شامل ہوا۔ سیاسی صورتحال کے متعلق انہوں نے کہا کہ پاکستان میں آئین اور جمہوریت بحال ہو چکی ہے۔ انہوں نے کہاکہ ہم پاکستان میں ملاوٹ سے پاک جمہوریت کیلئے جدوجہد کر رہے ہیں۔ نواز شریف نے پاکستان اور بھارت کے درمیان ویزے کی پابندیوں کو ختم کرنے پر زور دیتے ہوئے کہا کہ اس حوالے سے دونوں ملکوں کو ترجیحی بنیادوں پرکام کرنا چاہیے۔ بھارتی وزیر نے مسلم لیگ(ن) کے قائد کو بھارت کا دورہ کرنے کی دعوت دی جسے انہوں نے قبول کیا اور مناسب وقت پر بھارت کا دورہ کرنے کا اعلان کیا۔دریں اثناء پاکستان مسلم لیگ (ن) کے قائد میاں نواز شریف نے کہا ہے کہ جمہوری قوتوں کا اتحاد ملک و قوم کے بہترین مفاد میں ہے اور اس لیے ہم چاہتے ہیں کہ یہ ہر حال میں بر قرار رہے‘ پرویزمشرف ڈکٹیٹر ہیں اور ان کے لیے پاکستان اور اس کی سیاست میں اب کوئی جگہ نہیں، انہیں جانا ہوگا ‘ وقت آنے پر پرویز مشرف کے مواخذے سمیت آمریت سے چھٹکارے کیلئے سب کچھ کیا جائے گا ‘ ہم چاہتے ہیں کہ عدلیہ اور ججز اعلان مری کے مطابق بحال ہوں، انہوں نے واضح کیا کہ جج بحال ہوں گے اور جمہوریت اور ججزکی بحالی کیخلاف سازشیں کرنے والوں کو منہ کی کھانا پڑے گی۔ ان خیالات کا اظہار انہوں نے ایک غیر ملکی اخبارکو دیئے گئے انٹرویو میں کیا۔