آئی پی ایل :کنگز الیون پنجاب نے ممبئی انڈینز کو 66رنز سے ہرا دیا

کراچی: انڈین کرکٹ لیگ(IPL) ورلڈ سیریز کے ایک اہم میچ میں بھارتی اداکارہ پریٹی زنٹا کی ٹیم کنگز الیون پنجاب نے ممبئی انڈینز کو 66 رنز سے شکست دے دی۔ کنگز الیون کی جانب سے 182 کا آسان ہدف شاندار فیلڈنگ اور بہترین بولنگ کی بدولت ممبئی انڈینز کیلئے پہاڑ ثابت ہوا۔ کمارا سنگا کارا نے نمایاں94 رنزبنائے اور مین آف دی میچ رہے۔ ایک موقع پر عرفان پٹھان اپنی ہیٹ ٹرک مکمل نہ کرسکے یہ دلچسپ میچ ”جیو سوپر “نے اپنے کرکٹ شائقین کیلئے کرکٹ ایسوسی ایشن اسٹیڈیم موہالی سے براہ راست نشر کیا ۔ تفصیلات کے مطابق ممبئی انڈینز نے ٹاس جیت کر پہلے کنگز الیون کو بیٹنگ کی دعوت دی ۔ کنگز الیون کی جانب سے گوئل اور عرفان پٹھان میدان میں اوپن کرنے آئے ، اِس ٹیم کا حوصلہ اُس وقت ٹوٹ گیا جب میچ کا آغاز ہوتے ہی عرفان پٹھان 6 رنز بنا کر کیچ آؤٹ اور گوئل 18 رنز بنا کر رن آؤٹ ہوئے۔ کپتان یوراج سنگھ میدان میں آئے تو شائقین کو اُن کی شاندار بلے بازی کی توقع تھی مگر قسمت اُن پر بھی مہربان نہ ہوئی اور وہ بھی 18 رنز بنا کر کیچ آؤٹ ہوگئے۔ کنگز الیون کی ڈوبتی کشتی کو سہارا دینے کیلئے سنگاکارا میدان میں آئے اور وکٹ کے چاروں طرف شاندار شارٹ کھیل کر ٹیم کے اسکور میں 94 رنز کا اضافہ کیا۔ اُنہوں نے 1 چھکا اور 13 چوکے مارے ۔ سہیل ، سری ناتھ اور چاولا کوئی رن بنائے بغیر آؤٹ ہوئے جبکہ سروان 7،جے وردھنے12رنز بنا سکے ۔ آخر میں بریٹ لی 16 رن بنا کر ناٹ آؤٹ رہے اور اس طرح کنگز الیون کی پوری ٹیم مقررہ اوورز میں 182رنز بنا کر آؤٹ ہو گئی ۔182 رنز کا آسان ہدف عبور کرنے کیلئے ممبئی انڈینز کی جانب سے جے سوریا اور رونچھی میدان میں آئے تو بریٹ لی نے اپنی ہی گیند پر جے سوریا کا خوبصورت کیچ لیکر اُنہیں پویلین لوٹا دیا،جے سوریا 1 ایک رن بنا سکے ۔ بریٹ لی نے دوسری ہی گیند پر شاندار فیلڈنگ کرتے ہوئے رنچھی کو بھی رن آؤٹ کردیا اور اسکور کارڈ پر ممبئی انڈیز کا اسکور 2 وکٹ کے نقصان پر صرف14رنز تھا۔اوتھاپا 21 رنز بنا کر سروان کے ہاتھوں کیچ آؤٹ ہوئے۔ آف اسپنر چاولا نے شاندار بولنگ کرتے ہوئے ڈی جے براووکو23 اور تیواری کو 17 رنز پر کلین بولڈ کیا۔ اے ایم نیئرکو 2 اور ہربھجن سنگھ کو صفر پر ایل بی ڈبلیو آؤٹ کرکے عرفان پٹھان ہیٹ ٹرک چانس پر آگئے تاہم وہ اپنی ہیٹ ٹرک مکمل نہ کرسکے۔ اس موقع پر ممبئی انڈینز کا اسکوار7وکٹ پر98رنز تھا۔ شان پولاک نے اپنی ٹیم کیلئے 22 رنز کا اضافہ کیا، یوراج سنگھ نے اُن کا ناقابل یقین کیچ لیا ۔ ایم اے کھوٹی 8 جبکہ ڈی ایس کلکرنی اور اشیش نہرا2-2رنز بنا کر ناٹ آؤٹ رہے اور اس طرح 182 کے جواب میں ممبئی انڈینز کی پوری ٹیم 9 وکٹوں کے نقصان پر 116 رنز بنا کر شکست سے دوچار ہوئی۔ واضح رہے کہ ممبئی انڈیز کی قیادت IPL سیریز میں سچن ٹنڈولکر کو سونپی گئی ہے تاہم سچن ٹنڈولکر ان فٹ ہونے کے باعث ٹیم میں ابھی تک شامل نہیں ہوئے عارضی طور پر اِس ٹیم کی قیادت ہربھجن سنگھ کررہے ہیں ۔