اسٹیٹ بینک کی جانب سے بینکوں کو ڈالرز کی فراہمی ،قیمت میں ایک روپے کی کمی

کراچی: اسٹیٹ بینک کی جانب سے بینکوں کو ڈالر کی فراہمی کے بعد اوپن کرنسی مارکیٹ میں جمعہ کو ڈالر کی قیمت میں ایک روپے کی کمی ہوئی جس کے بعد ڈالر کی قیمت 66.80 روپے سے کم ہو کر 65.80 روپے ہو گئی۔ ڈالر کی بڑھتی ہوئی قیمت کو کنٹرول کرنے کے لئے اسٹیٹ بینک اور ایکسچینج کمپنیوں کا ایک اجلاس ہوا جس کی صدارت اسٹیٹ بینک کے ڈائریکٹر فارن ایکسچینج نے کی۔ اسٹیٹ بینک نے ایکسچینج کمپنیوں کو ہدایت کی ہے کہ انٹر بینک مارکیٹ اور اوپن کرنسی مارکیٹ میں ڈالر کی قیمت میں فرق90 پیسے ہونا چاہئے۔ اوپن کرنسی مارکیٹ میں ڈالر کی قیمت انٹر بینک کے مقابلے میں40 پیسے سے زیادہ نہ ہو۔ اس موقع پر ایکسچینج کمپنیوں نے بتایا کہ بینک انہیں ڈالر فراہم نہیں کررہے جس کے باعث مارکیٹ میں ایک طرف ڈالر کی قلت ہے تو دوسری جانب بڑے پیمانے پر ڈالر کی ہولڈنگ کرلی گئی ہے۔ اس صورتحال کا نوٹس لیتے ہوئے اسٹیٹ بینک نے فیصلہ کیا کہ وہ بینکوں کو ڈالر فراہم کرے گا اور بینکس یہ ڈالر ایکسچینج کمپنیوں کو ان کی ضرورت کے مطابق دیں۔ اسٹیٹ بینک کے اس فیصلے کے بعد جن لوگوں نے ڈالر ہولڈ کر رکھا تھا انہوں نے بھی مارکیٹ میں ڈالر بیچنا شروع کر دیئے جس کے باعث جمعے کو ڈالر کی سپلائی بڑھ گئی اور ڈالر کی قیمت ایک روپے کم ہو گئی۔ مارکیٹ ذرائع کاکہنا ہے کہ آئندہ دنوں میں ڈالر کی قیمت مزید کم ہونے کا امکان ہے۔