کمیٹی نے سفارشات مرتب کرکے بھجوا دیں ،قیادت ایک دو روز میں فیصلہ کریگی،فاروق نائیک

اسلام آباد : ججوں کی بحالی کے حوالے سے پیپلز پارٹی اور مسلم لیگ ن کی کمیٹی کے اجلاس کے بعد صحافیوں سے گفتگو کرتے ہوئے وفاقی وزیر قانون فاروق ایچ نائیک نے کہا کہ کمیٹی نے سفارشات مرتب کر کے آصف علی زرداری اور میاں نواز شریف کو بھجوا دی ہیں، پارٹی قیادت ایک دو روز کے اندر حتمی فیصلہ کریگی، تمام فیصلے آئین وقانون کے مطابق کئے جائیں گے اور سب سرخرو ہوں گے۔ وفاقی وزیر قانون فاروق ایچ نائیک نے جمعہ کی شب کمیٹی کے اجلاس کے بعد صحافیوں سے گفتگو کرتے ہوئے بتایا کہ کمیٹی نے ججز کی بحالی کے حوالے سے بات چیت کا تیسرا دور مکمل کرلیا ہے اور اپنی سفارشات پارٹی قیادت آصف علی زرداری اور میاں نواز شریف کو بھجوا دی ہیں پارٹی قیادت ایک یا دو دن کے اندر حتمی فیصلے کا اعلان کریگی انہوں نے کہا کہ تمام معاملات خوش اسلوبی سے طے پاگئے ہیں تمام فیصلے آئین اور قانون کے مطابق کئے جائیں گے اور سب سرخرو ہوں گے عوام بھی مطمئن ہوں گے انہوں نے کہا کہ موجودہ جمہوریت میں عوام کی قربانیاں اور خون شامل ہے جمہوریت لانے کیلئے ہماری قائد محترمہ بے نظیر بھٹو نے اپنی جان قربان کر دی وہ پارلیمنٹ کی بالادستی ، عدلیہ کی آزادی اور قانون کی حکمرانی چاہتی تھیں، ہم اور پارٹی کے شریک چیئرمین آصف علی زرداری اسی وژن کو لے کر چل رہے ہیں انہوں نے کہا کہ انشاء اللہ ججوں کی بحالی کا مسئلہ خوش اسلوبی سے حل ہو جائے گا تاہم اس حوالے سے حتمی اعلان پارٹی قیادت ہی کریگی۔