این اے 272 کے رکن قومی اسمبلی کی اسناد کا ریکارڈ جامعہ کراچی سے غائب

کراچی: قومی اسمبلی کے حلقہ 272 کچ کم گوادر سے رکن قومی اسمبلی یعقوب کی اسناد کا ریکارڈ جامعہ کراچی سے غائب ہوگیا ہے۔ سابق وفاقی وزیر تعلیم زبیدہ جلال نے جامعہ کراچی کے حکام سے ایک خط میں درخواست کی تھی یعقوب ولد امام بخش رول نمبر 685933 نے 2006ء میں جامعہ کراچی سے بی اے پرائیویٹ کیا ہے ان کا تعلیمی ریکارڈ چیک کیا جائے اور ان کے میٹرک اور انٹر کرنے کے بارے میں تفصیلات فراہم کی جائیں۔ جامعہ کراچی کے ذرائع کے مطابق جامعہ کراچی میں یعقوب کا کوئی ریکارڈ موجود نہیں انہیں رجسٹریشن کارڈ تو جاری کیا گیا مگر جامعہ کراچی کے پاس اس حوالے سے کوئی ریکارڈ موجود نہیں واضح رہے کہ قومی اسمبلی کے رکن یعقوب کا تعلق بی این پی عوامی سے ہے اور انہوں نے حالیہ انتخابات میں این اے 272کچ کم گوادر سے 61655 ووٹ لے کر سابق وفاقی وزیر تعلیم زبیدہ جلال کو شکست دی تھی۔