حق پرستی کی تحریک میں عظیم طارق کا لہو بھی شامل ہے، الطاف حسین

لندن: متحدہ قومی موومنٹ کے قائد الطاف حسین نے ایم کیوایم کے سابق چیئرمین عظیم احمد طارق شہید کو انکی برسی پر زبردست خراج عقیدت پیش کیا ہے اورکہا کہ شہداء کی لازوال قربانیو ں کی بدولت ایم کیو ایم ایک دن ضرور اپنی منزل پر پہنچے گی ۔ 15ویں برسی کے موقع پر اپنے ایک بیانمیں الطاف حسین نے کہاکہ حق پرستی کی تحریک میں ہزاروں شہداء نے اپنے خون کے نذرانے دیئے ہیں اور ان میں عظیم احمد طارق شہید کا لہو بھی شامل ہے ۔ انہوں نے کہاکہ ایم کیوایم اپنے شہداء کی قربانیوں کو ہرگز رائیگاں نہیں جانے دے گی اور حقوق کے حصول تک اپنی حق پرستانہ جدوجہد جاری رکھے گی ۔دریں اثناء متحدہ قومی موومنٹ کے زیر اہتمام عظیم احمد طارق شہید کی 15ویں برسی آج یکم مئی کو انتہائی عقیدت واحترام کے ساتھ منائی جائے گی۔ اس سلسلے میں بعد نماز ظہر تا عصر نائن زیرو سے متصل خورشید بیگم میموریل ہال میں قرآن خوانی و فاتحہ خوانی کی جائے گی اور عظیم احمد طارق شہید سمیت تمام حق پرست شہداء کو زبردست خراج عقیدت پیش کیا جائے گا۔ برسی کے اجتماع میں ایم کیوایم کی رابطہ کمیٹی، اراکین قومی اورصوبائی اسمبلی، ٹاؤن ناظمین، یو سی ناظمین، کونسلر اور کارکنان زیادہ سے زیادہ تعداد میں شرکت کریں۔